“Балалық шақ мәңгі есімде”

“Балауса” бөбекжайының “Қоқиқаз” ересек тобында “Балалық шақ мәңгі есімде” атты әсерлі қоштасу кеші жоғары деңгейде ұйымдастырылды.
Мерекелік шараның басты мақсаты – бүлдіршіндердің балабақшадағы бақытты күндерін еске алып, мектеп өміріне қадам басар сәтін қуанышпен атап өту болды. Кеш барысында балалар әсем ән шырқап, жүрекке жылы әсер сыйлайтын тақпақтарын мәнерлеп оқып, би билеп өз өнерлерін паш етті. Әрбір бүлдіршіннің бойынан балалықтың бал дәурені мен тәрбиенің жемісі анық байқалды.
Сонымен қатар, мерекеге ертегі кейіпкерлері – түлкі мен қоян қонаққа келіп, балалармен қызықты ойындар ұйымдастырды. Олар бүлдіршіндердің білімдерін тексеріп, тапқырлығы мен зеректігіне тәнті болды. Балалар сұрақтарға белсене жауап беріп, ойындарға қызығушылықпен қатысып, көтеріңкі көңіл-күй сыйлады.
Кеш барысында ата-аналар балаларының жетістіктеріне қуанып, тәрбиешілерге шынайы алғыстарын білдірді. Балабақша ұжымы ата-аналарға алғыс хаттар табыстап, өзара сыйластық пен ынтымақтастықтың маңызын атап өтті. Ал бүлдіршіндерге дипломдар беріліп, олардың алғашқы жетістіктеріне құрмет көрсетілді.
“Балалық шақ мәңгі есімде” атты бұл кеш балалардың есінде ұзақ сақталатын ерекше мерекеге айналды. Балабақша қабырғасында өткен қызықты сәттер мен балғын шақтың тәтті естеліктері әрдайым жүректерінде сақталары сөзсіз.